[قصة عجيبه لغيرة إمرأة]
ـ[ريم الغامدي]ــــــــ[05 - 04 - 10, 10:42 ص]ـ
غيرة المرأة
على لسان البنت اللي شافت الموقف
تقول: وأنا أصلي بالحرم الأ بذيك الحرمة الكبيرة بالسن اللي تصلي وتبكي
تصلي وتبكي وتدعي وتبكي
أنا استغربت منها وقلت أكيد لها سالفه وكان كل مابين فتره وفتره يجيها ولد شاب يكلمها ويروح ويشوف وش تبي
أنا أخذني الفضول بصراحه وجلست بجنبها وسألتها ليش تبكين عسى ما شر
قالت لي ما في شي , أنا أصريت وسألتها مره ثانيه .. سكتت شوي بعدين قالت والله من العذاب اللي فيني
ليش؟ وش السالفه؟؟!!
قالت لي أقولك قصتي وبعدين احكمي
كنت متزوجه من زوج ونعم الأزواج يحبني ويحترمني ويعزني
بس كان فيني عيب إني ما أجيب عيال وأنا حاولت بس الله مارزقني فشرت عليه انه يتزوج ثانيه وهو مارضي في البدايه بس أنا قعدت احن واحن الين وافق
فبحث له عن الزوجة وخطبتها له وتم الزواج بس بعد ما تزوجها شبت نار الغيرة بقلبي لأنه اخذ يميل لها و فتره بسيطه ألا وزوجته حامل زادت غيرتي
المهم جابت له ولد الزوج استأنس وفرح وقعدت أنا أفكر بنفسي كيف أنا اللي شرت عليه
في يوم جاني زوجي وقال لي بسافر مع مرتي الثانية وبنخلي الولد عندك
ووافقت طبعا لأنه ما في احد يمسك الولد غيري
سافروا وخلو الولد عندي وكان الوقت شتاء وكنت شابة الجمر
والولد عمره تقريبا سنه وكم شهر وهو يلعب قدامي
وأنا بقلبي نار تشتعل مثل الجمر وشلون يأخذها ويسافر ولا ... !!
ويخلي الولد عندي ومن هالكلام وفجاءه الأ الولد يمد يده بيلعب بالجمر ومن ناري وغيرتي مسكت يدينه وحطيتها أكثر بالجمر اليين ذابت يده وهنا شلتها بعدها مايحتاج أقولك اشلون صارت يد الولد
وكذا حسيت أن ناري طفت اشوي نمنا ذيك الليله الأ ويجينا خبر وفاة زوجي مع زوجته وهم في طريق العوده بحادث
وظليت بروحي عايشه مالي احد غير ربي ومن ثم الولد اللي تشوفينه وصار أكثر من ولدي واعز ويدور راحتي ويرعاني ومالي ظل غيره
هو اللي يشوف طلباتي وطلبات البيت ومو مقصر معاي بشي
بس أنا كل ماشفت يده يتقطع قلبي على اللي سويته فيه وهو يناديني يمه بس إلى الآن ماقلت له إني أنا اللي شوهت يده
ولازلت أعاني من العذاب وتأنيب الضمير وادعي ربي يغفر لي ذنبي
سبحان الله وشلون حكمة ربك انه صار خير لي .. لولا ها لولد كان أنا حالتي حاله
ويرد يجيها الولد وهو مخبي يده ويحب راسها ويسألها
ها يا الغالية نروح الحين ..
قال تعالى ..
(وعسى أن تكرهوا شيئا وهو خير لكم)
ـ[أم عبد الكريم]ــــــــ[05 - 04 - 10, 01:09 م]ـ
سبحان الله ..
رب ضارة نافعة
ـ[براءة]ــــــــ[05 - 04 - 10, 01:32 م]ـ
سبحان الله
قصة عجيبة
بارك الله فيكِ
ـ[أم عمير السلفية]ــــــــ[05 - 04 - 10, 02:26 م]ـ
أسأل الله أن يغفر لها
اللهم طهر قلوبنا من الحقد والغل والغيرة
بوركتِ على النقل لعل الاخريات يتعظن بها
ـ[أم البخاري]ــــــــ[05 - 04 - 10, 06:14 م]ـ
أبكيتيني معاكي يا اختاه
قلبي تعور
الله يلهمها كل خير
وتستر على نفسها وما تفضح قصتها
ـ[ريم الغامدي]ــــــــ[06 - 04 - 10, 01:43 ص]ـ
جزاكم المولى خير الجزاء على مروركم الجميل وتفاعلكم الأجمل ..
وأسال الله أن يغفر لها ولنا جميعاً ويرحمنا برحمته ..
تقبلوا خالص تحياتي ..
محبتكم في الله / ريم الغامدي
ـ[(مريم)]ــــــــ[07 - 04 - 10, 01:56 ص]ـ
لا إله إلا الله ...
بس لو تلاحظون ترى هي إلي وافقت على زواج زوجها فالله عوضها بهذا الولد ...
بس سبحان الله غيرتها خلتها تعاني ..
ـ[حفيدة خديجة]ــــــــ[09 - 04 - 10, 01:22 ص]ـ
أي صحيح .... الله المستعان
الله يرحم ضعفها
هذه عبرة لنا جميعا دائما ننظر للامور بعقولنا القاصرة
نظرت لخروجهما معا دونها بخس لحقها وفي الحقيقة هو الاجل يناديهم
وقدما لها اجمل هدية
اصلا سبحان ربي العظيم وكانما زوجها تزوج وانجب لاجلها
يارب ارزقنا الحلم
ليتنا نرضى بكل ما يقدره ربنا لانه دائما وأبدا وراه الخير الكثير وننتصر على هوى انفسنا
ـ[أم عبد الرحمن المصرية]ــــــــ[11 - 04 - 10, 07:29 ص]ـ
سبحان الله العظيم!
أسأل الله أن يغفر لها
اللهم طهر قلوبنا من الحقد والغل والغيرة (غير المحمودة)
بوركتِ على النقل لعل الاخريات يتعظن بها
آمين
وتقبلي مني أختي ...
(امرأة) تكتب بألف وصل
جزاكِ الله خيرا
¥