تبكي بكي أهبال وتنق عليا لوما شدوها أروحوا قاع أتوام
ياخداع أمشيت بالزهد عليا ماقلت على خير ماقلت السلام
غير البارح ياك ناديت عليا قلتلي كي نبرى أروحوا للحمام
غير البارح ياك ضحكت عينيا وقلت أنا مازال نطمع في ليام
وثرنتك خداع وتزلبح فيا عيب عليك وعار هاذ الشي وحرام
أصبح دمعي على خدودي جرايا وأصبح قلبي كيشة في يد اللحام
ياخداع أهديتني لمن بيا واش تسال خليلتك في هذا العام
ياخداع علاه صديت عليا ياخداع علاه تهدالي ليتام
يازهرة قلبي وقرة عينيا ياعز الكبدة وياميرة لريام
ياك مضاري فيك نلقى العزمية او وقت الحزة غير بخيالك نقيام
وكنت كالوردة في قلبي غي هيا وكنت كي القمرة في ليلي كي يظلام
كنت خير عشير في العشرة ليا وياعزي مافيكشي حاجة تتلام
وكنت راحة بال وركيزة ليا وكنت شمس ربيع كي جوي يغيام
كنت ماكنت في الدنيا ليا عمر اللي كنتيه مايكفيه أكلام
وياك مضاري بيك عندك عقليا واش صرالك كيف خلطتي لكلام
خافي ربي لاتنوحيش عليا ياك الموت امحتمة ماكان أدوام
ماهي أزهر أنقول طاحت غي فيا ماهي مال أنقول نتسلف غي عام
ماهي بيدي نقول نديك معايا ولاهي بيدك تقسمي عني ليام
ياهولي نوصيك إيلا كنتي ليا هاذ الويغش لا تلوميهم بكلام
المازوزي نبغيه كيما عينيا وبعد فراقك خايفه يحضى يتلام
غدوة حين يفيق ويقول بايا قولي له مازال في الخدمة خدام
ويلا حسوه طول البكي عليا وريله تصويرتي يضحك وينام
أورانا متسامحين يالوخيا نطلب ربي يصبرك في هذا العام
نطلب ربي مايوريك بليا نطلب ربي يحفضك من كل حرام
أوراني راضيك مادمت حيا وأرضاي عني لا تحافيني بكلام
خلينى نلهى بما ساير بيا وخليني نمشي مهني لا تخمام
جابولي غسال واتكلف بيا ياحسرا ه أنا موالف بالحمام
عرا جسدي ماهدا فوقي حيا وغسلني من الراس حتى وصل لقدام
بعد أن غسلني جابلي كفني ليا أقطيعة بيضة مايساومها سوام
ياذ الخلق علاه تتمسخر بيا ياك موالف كسوتي فيها لكمام
أموالف سباط كاسي رجليا تهداني لياه حافي من لقدام
واين السروال والقمجة الغربيا وين الجيب اللي متن التزدام
نرجا فيه يرد مارد عليا واثرنته أنا تلف عني الكلام
فالوقت المعلوم أتجمع غاشيا ماتسمع ضحكة ولا تخزر تبسام
ويادلالي لا تعيدوش عليا ومع الخرجة ماصار في حربة ليتام
المازوزي مسكين طايح في الوطيا ولامن خاف عليه من كثرة لقدام
وثرنته مخلوع مافاهم حيا ماهو يبكي ذا الطفل ماهو بسام
غير يصحح لاغنا يخرج فيا وانيا ملموم في كفني تلمام
ياعظيمي نسوه بالهدرة فيا وخلوني نمشي الحال قصد ظلام
وما دارو لبزوز بالبكي حذايا ومادارت بخدودها ميرة لريام
ياحسراه وصايتي والعقليا وياحسراه على أختي زهرة ليام
كي المجنون تنوض وتطيح عليا وموعرها ببكى ومقسحها بكلام
ياجلول علاه تستشفى فيا ماني زوجة خاينة مادرت أحٍرام
وأموالف عند الباب تتلفت ليا أومحلاك بنظرة أومحلاك أبتبسام
وأتسولني ناقصتني حيا وباه نرد عليك يتلفلي لكلام
جيب الخضرة ولاتجيب زروديا ولاتنسى لتاي لاتنسى ليدام
ولاكانش ديسير للبز أشويا وأخبرني مرقة أغدانا ولاأطعام
وأجيب أحبيبة مسكتة في يدك ليا أوخلي ليا باه نمشي للحمام
ياخداع اليوم ماسلت عليا ورحت مغطي مابغيت ترد كلام
حرمت النعمة مع النوم عليا وبعدك حتى الضحك عني راه حرام
وشوف لحالي شوف ماصاير بيا وشوف لدارك واش صاير في ليتام
ياجلول علاه تستشفى فيا ياك عاشرتك بالصفا مادرت أحرام
وأموالف عند الباب تتلفت ليا أومحلاك بنظرة أومحلاك أبتبسام
ويجوك أولادي شوارك جريا وما كثرهم بزقا وما كثرهم بزحام
واحد طامع فيك تشريله حيا ولاخر باغي يتبعك وانت خدام
وتتبسم وتروح تهداهم ليا هذا يبكي وذاك متزعف تمتام
وياجلول اليوم ماسلت عليا ورحت متلمد لاحديث ولاتبسام
خليت أحوالاك مليوحة ليا أوخليت الساعة أوجيبك فيه الزدام
وخليت تصاوير عندي محظيا لو نخزر فيها تحطمني تحطام
وياظالم لله غي رد عليا وخبرني كيفاش نعمل في ذا العام
يالسامع بالسيف ماخرجوا بيا كفني غي ربي ويحظي خيط فيام
خطفوني وهداو ولفي في الوطيا الوجه تقردش والشعر تبشم تبشام
رفدوني وخضاو للمدينة بيا لو تتبعني واش يوصلك أكلام
واحد قال أرخيص مايسوى حيا ولاخر قال أثمين مثله ما يتسام
دخلوا القرابة وخرجوها بيا وصلوا سيد الشيخ دخلوا باحترام
¥