حطوني قدامهم فوق الوطيا أوللقبلة دارو صف ورا ليمام
كي كبر صلاو بالسر عليا وبهزت ليا أجماعتي بعد السلام
حطوني في قبر معبورعليا وصددني تراس للبيت الحرام
عرا وجهي من الكفن وخزر فيا وأتنهت وبلاه من حالي تخمام
وسواو الحجرات غي بالعقليا وياهولي من فوقهم زادوا عرام
ياناسي لله غير أدعوا ليا أوقولوا ياربي أغفر مادار أحرام
بكر أولادي بغى يدير الرجليا جات دموعها هاطلة وفواده عام
الناس تصبر فيه والصبر أمزيا وهو ساهي مافهم للناس كلام
ياولدي براك من البكي عليا بكيك مايشفي ولا يحي لعظام
واسمحلي لله نوصيك وصيا تبعها لبغيت تنجى من الحرام
احرز روحك لاتوالفش الدنيا ولاتعشق فيها ولاتطمع بدوام
وعبد من سواك صبحا وعشيا وصليله في الليل والغاشي نيام
وكون ارزين وكون مولى عقليا وشد لسانك لاتكثر بيه أكلام
لاتمزحش أكثير تندم في الدنيا ويحضى بخص الناس في عرضك سوام
واحكم في عينيك واقسط في المشيا وأحصن فرجك لا تقرب بيه أحٍرام
صفي رزقك كون زاهد في الدنيا وقهر نفسك كون لهواها فطام
الدخان أخطيه علة وبليا وعند الناس الفاهمة مكروه أحرام
ايكره لنفاس ويهد الريا والقلب يعييه ولجسدك هدام
لاتغتب لاتصاحب أصحاب الدنيا لاتمشي في الناس بلسانك نمام
أعليك العساس صبحا وعشيا يجردلك في فعالك بالتمام
يشوف لي باينة ولي خافيا لاتغلطتش تقول يسهى ولاينام
إذا كنت فقير ماتكسب حيا الحرفي في الجوع تلقاله ليدام
واذا تاخد خذ طفلة دينيا لاتاخذ لي خبرها في لفوام
وأصحب ناس العلم واهل العقليا وهوياك تكون لعان وشتام
لي ظلمك ياك غير دار مزيا ويوم الفصل يردلك حقك بتمام
أعشر قاع الناس عشرة مرضيا وكرم جارك لاتشد عليه أطعام
لاتحقرش أضعيف طايح في الوطيا لاتغلطتش تقول ممتني بعظام
لاتظلم مسكين ماطاق لحيا أولا تعبد مركانتي في ماله عام
لاتغلطتش تقول رزقي بيديا الخالق هو الرزاق والقسام
لاتغلطتش أتقول زهدي في الدنيا ينقذني في لآخرة يوم الخصام
وهرب ليه برحمته عالي العليا رحمة ربي مايقومها قوام
دايرها تنجي أصحاب المعصيا ينقذ بها من بغا يوم الخصام
لاتقنعشي بالعلوم الدونيا عمر القشرة مارضا بها فهام
وشوف وراها للكنوز المخفيا تصيب الحكمة كامنة في كل أمقام
هذا رمز الله في نص الآيا في قصة موسى ولخضر والغلام
لاتقنط لاتقول واش صرا بيا أدست لوراق وترفعت لقلام
ياوليدي نوصيك وتصنت ليا أحرز روحك لاتخالطتش الحكام
خلطتهم تعطيك ياسر في الدنيا ويوم يدلوك في القبر تلقاه ظلام
عند الهدرة أتقول عنهم أوليا وياك الكثرة غير خيان وظلام
كثرتهم لاهين في لهو الدنيا كثرتهم ماليين بالكذب والحرام
سمع أخوتك قاع هاذ الوصيا ولاتجحدها على يفهم لكلام
واتهلى في اميمتك دير امزيا وقوم مقامي لاتبدل بيه أمقام ونوبة نوبة دير معروف عليا للفقراء والمساكين واليتام
وجيب علي فاتحة في كل عشيا كي تبدو لفطور في شهر صيام
واطلب ربي يلطف بلطفه بيا ويحشرني في زمرته سيد الأنام
ولاك بعقلك شوف وتسخبر فيا ودير في راسك باش تتلقى ليام
من داري صديت ماجايب حيا لاقطيعة كتان سترتلي لعظام
ياحسراه على الناس لي ليا وياحسراه على لي بيهم نقيام
ياسر منهم ياك من ناح عليا وياسر غير واكالين أطعام
دفونني ومشاو مسالوا فيا وعقبوني للدار وبداو التقسام
وانيا قليل مانكسب حيا لاذهب مخبي ولابنيان رخام
وتمسيت وحيد لاحد معايا لامن سماني نجيب معاه أكلام
وطاح الليل على القبور المنسيا وأنشر فوق المقبرة خيدوس ظلام
وأتساوت الناس في هذا الوطيا كي لي مات اليوم كلي عندو عام
كي لي مات أصغير مايعرف حيا كي لي مات منين نشفو لو لعظام
ماتفرز قليل تحت القبرية وماتفرز مركانتي تحت العرام
أبقاو على خير ياناس الدنيا وسامحني يالي عملت معاك ظلام
ياربي ياخالقي عالي العليا يامن نزلت رحمته في كل أمقام
جيتك طامع فيك تستجب ليا واللي طامع فيك عمره مايتلام
جيتك عبد أفقير ماجايب حيا جيتك عبد أضعيف ماطايق لخصام
فضلك فضل أكبير عني في الدنيا وانا شكري ليك مايسواش أقرام
لوما فضلك مانعيش ولا نحيا لوما خيرك مانقوم على لقدام
وانا خيري أقليل مابان عليا وياويحي قداه درت معاه أحرام
ماصليت أوقات مكتوبة فيا ولاقمت بسنة ولا كملت أصيام
جرتني في وادها هاذ الدنيا وزلبحني رايي وفرطت في لرحام
¥