أرشيف منتدى الفصيح - 3

[قضا أخف من قضا]

ـ[حمدي كوكب]ــــــــ[31 - 12 - 2005, 02:59 م]ـ

[قضا أخف من قضا]

(باللهجة العامية المصرية)

حمدي كوكب

صعيد مصر

ــــــــــــــــــــــــــــــــــــــــــــــــــــــــــــــــــــــــــــــــــــ

قاعد قدام البيت

وسامع طقطيق في الحيط

لأ. .. ما خايفش

إن كان زلزال

خليه للأرض يهز

خلي الحيطه تقع وتدب

مـ ليها زمان

واقفه وبتضج

يووووه

دا أهل النجع جايين من الغيط

بثورة تخض

تشيل وتحط

شدني من إيدي الواد شعبان

قوم رايحين نستنكر

هناك فوق الشط

يللا تعال معانا

هنقول كلام تهويش

ونستنكر ... ونقول ... ويعيش

أيوه هناك

أصل السلطان هيمر

ف مركب كان ولا سفينة

ولما يشوفنه بنحييه

أكيد هيسترأف بينا

قلت فـ نفسي

أقولك ايه يا واد يا مرسي

قوم روح

واستنكر ... قول ... ويعيش

وسيب الحيطة تدب

ساسها قديم

دابت مـ الميه

مـ هي مش حيطة

دا كلها كام جلوسين طين

ورحت هناك يا خويا

وشفت

سفينة جاية من الجنة

فيها السلطان

بيشاور لينا

وهتفنا وقلنا

إحنا بنستنكر حالنا

لكن خفنا

لحسن حد من الخفر يكشفنا

ويسمعنا بنستنكر

وندين

وعلطول

غيرت الكلمة وقلت

يعيش ..

يعيش السلطان

سلطانا

ولما مشى الخفر من قدامنا

غيرت الكلمة

وقلت

إحنا بنستنكر حالنا

أيوه بنستنكر وندين

نجعنا كله جلوسين طين

عايزين نتغير نبقى زنين

يوووه … فيه خفير واقف جارنا

علطول غيرت الكلمة

وقلت يعيش

يعيش السلطان سلطانا

وقلت ف سري

على ايه

من ايه …

خايف

والله لاستنكر وأدين

وأعلي صوتي والناس سامعين

وأشتكي للسلطان حالنا

وخدتني العزة

وقلت ودِنت

وعليت صوتي:

عايزين نبقى زنين

علطول فـ الحال خدوني خفيرين

اسكت ما اسكتش

على كام بوكس

لقيت نفسي سجين

وخدني البوكس

ومر قدام البيت

سمعت هيصه وزيطه

وصراخ عالي

وحاجه كده زي العيطه

بصيت من خرم البوكس

لقيت قدام

بيتي واقعة الحيطة

هذه محاولة زجلية (باللغة العامية) في انتظار التعليق والرد من السادة زوار موقع (الفصيح لعلوم اللغة العربية) مع العلم أنها باللهجة العامية المصرية.

ولكل قارئ وزائر الشكر، ومقدماً لكل من أراد الرد والمشاركة الشكر والاهتمام بالرد ومحاولة الأخذ بما يجب أن يكون.

شكراً لكم

والسلام عليكم ورحمة الله وبركاته

حمدي كوكب

صعيد مصر